“Gazza knallar mær ein upp á kjaftin”

Teir Gulu og Bláu, Jarn­skor­beiggj­arnir, Jens Martin Knudsen, knall­harði Janus Ras­mussen og ikki minst Jóhan Nielsen á síðu­linj­uni.

Menninir í Gøtu eru kong­ar­nir í føroyskum fótbólti frá 1993 til 1996, tá GÍ vinnur fýra før­oya­meistara­heiti á rað. Men alt hevur sína tíð, og tá 1996 verður til 97, hóm­ast tekin í sól og mána um, at kraft­depilin í før­oysk­um fótbólti ikki long­ur fer at liggja í Sarpu­gerði.

Eru gøtumenn kongar í dunnu­hylinum í norðuratlanshavi í mið­hálv­fems­unum, er Glasgow Rangers tað í enn størri mun í Skotlandi. Síðan kappingarárið 1988/89 hevur stór­felagið vunnið meistaraheitið hvørja ferð, og á sumri í 97 bendir tað mesta á, at menninir hjá Walter Smith fara at knúsa gitna metið hjá arva­fígg­ind­anum, Celtic, og taka tíggjunda gullið á rað til Ibrox.

Hópurin er á tremur við stjørnum. Paul Gascoigne er komin úr Lazio nøkur ár frammanundan, og telist millum bestu spælararnar á bretsku oyggjunum. Danski stórspælarin, Brian Laudrup, er eisini “bjargaður” úr Italia og Fiorentina í 1994, og er saman við Gazza ein av høvuðs­orsøk­unum til, at Rangers dominer­ar hesi ár­ini. Rangers keypir eis­ini fleiri spæl­arar úr Serie A í summar­steðg­inum. Ein av teimum er Marco Negri úr Perugia, sum hevur skotið 33 mál tvey tey seinastu kappingarárini. 

– Tað besta av øllum er, tá vit hita upp. Samson Nesá knallar bóltin upp í tríkantin, og 50.000 áskoðarar leypa á føtur og klappa. Hann bukkar fyri teimum og alt, men tá er tað als ikki skotið hjá Samsoni, sum hevur elvt til fagnaðin, men heldur, at Gascoigne er komin á vøllin, flennir Sámal Joensen.

Júst Paul Gascoigne, sum nú er tøkur aftur hjá Walter Smith, er nakað fyri seg. Ikki bert ein guddómligur fót­bólts­spælari, men um somu tíð ein rættiligur serskøltur.