Lítli maður á brúnni – Allan fer í land!

Allan Simonsen er navn, sum ekkóar í fótbóltssøguni. Hann hevur sum einasti norðurlendingur verið kosin ársins fótbóltsspælari í Evropa. Tað var í 1977. Hann var undangongumaður á danska landsliðnum, sum spældi seg í fyrsta endaspælið nakrantíð. Tað var í 1984. Tá sluppu bara átta lið í endaspælið. Danmark vann sterka bólkin í undanakappingini, og í avgerandi dystinum móti Onglandi á Wembley í 1983 skeyt Allan Simonsen sigursmálið við brotssparki.

At hava so navnframan fyrrverandi spælara knýttan sum oddamann at okkara landsliði, gjørdi sítt til, at ansurin fyri Føroyum vaks víða hvar í Evropa. Um tað fekst sjón fyri søgn, tá Føroyar á heysti 1997 spældu móti Spania á útivølli. Hvørki fyrr ella seinni hava fjølmiðlarnir kringsett nakran føroyskan venjara sum ta ferðina. Har høvdu tey ikki gloymt fyrrverandi stórleikaran í FC Barcelona.

Eftir dystin flokkaðust tíðindamenn og myndamenn í stórum tali um okkara venjara. Allan Simonsen var søgan í Spania tað leygarkvøldið. Í dag kenna ungdómar ikki Allan Simonsen. Onkur ørminnist, at hann var við í sjónvarpsundirhaldsrøðini “Vild med dans” fyri nøkrum árum síðani. So fótfimur, hann var á leikvølli, skuldi tú kanska trúð, at hann dugdi sítt á dansigólvinum, men so var ikki. Hann kom ikki rættiliga á lagið, dómararnir kolldømdu hann, men hyggjararnir vildu treyðir sleppa honum.

Í blaðnum skrivar Suni Merkistein um sínar upplivingar við Allani Simonsen.