Lívið er als ikki ov stutt til Old Girls fótbólt

Hendan heystardagin á Ovara vølli í Gundadali er liðið mannað við kvinnum, sum samanlagt eiga 30 børn og fýra ommubørn. Tann elsta á liðnum er 56 ár, og tann yngsta er 36. Men um nakar heldur, at Old Girls hjá B36 bara eru við í FM fyri at luttaka, so má viðkomandi halda umaftur.

Meðan onkrar av kvinnunum á Old Girls-liðnum hjá B36 hava eina fortíð í bestu kvinnudeildini, eitt nú Súna Mørk, Vivian Larsen, Rannvá av Húsagarði, Maibritt Johannesen og Durita Rouch, so eru eisini aðrar, ið eru byrjaðar rættiliga seint at spæla fótbólt, eitt nú Beinta Danielsen.

– Eg spældi flogbólt og hondbólt, tá eg var ung, og byrjaði ikki at sparka, fyrr enn eg var 35 ár. Foreldrini hjá mær vildu ikki, at eg skuldi sparka, tá eg var lítið, tí tað var so lítið gentuligt, hildu tey. Nei, nei, ikki fótbólt. Tú oyðileggur beinini, søgdu tey. So eg slapp faktiskt ikki ordiliga, hóast eg tímdi ordiliga væl, greiðir Beinta Danielsen frá.

Umframt at spæla um FM um summarið, og spæla innandura um veturin, so hava Old Girls hjá B36 ferðast til Íslands at spæla eina innandura-kapping á hvørjum ári síðani 2014. Hesir túrar hava gjørt samanhaldið upp aftur tættari. Tað er tað eisini komnar nógvar góðar søgur burturúr.